Սևան քաղաքում մեկնարկել են ճանապարհաշինական աշխատանքներ (Տեսանյութ)

By | 31.07.2015 17:30

Միջպետական մայրուղուց դեպի Սևան քաղաք տանող ճանապարհն արդեն մեկ շաբաթ ակտիվ հիմնանորոգման փուլում է: Ճանապարհահատվածի սկզբնամասում դրված ցուցանակը տեղեկացնում է, որ հիմնանորոգումն իրականացվում է Համաշխարհային բանկի «Կենսական նշանակության ճանապարհացանցի բարելավում ծրագրով»:

3

 Ճանապարհաշինական խոշոր այս ծրագիրը բաղկացած է երկու ճանապարհահատվածից։ Առաջինը Երևան-Սևան-Իջևան միջպետական ճանապարհին միացող հատվածն է՝ 1,1 կմ երկարությամբ: Երկրորդը Սևան – Վարսեր-Ծաղկունք-Զովաբեր-Հրազդան հանրապետական նշանակության ճանապարհն է՝ շուրջ 2,5կմ երկարությամբ: Ծրագրի ընդհանուր գումարը կազմում է 475մլն դրամ:

1

12-ժամյա աշխատանքային գրաֆիկով աշխատող «Շանթ-Սեյրան» ՍՊ ընկերության շինարարները 3,6 կմ ընդհանուր երկարությամբ ճանապարհի 1,1կմ հատվածում արդեն ավարտել են ասֆալտի հին շերտի հեռացման, հողային պաստառի վերականգնման աշխատանքները և այժմ փռում են ավազակոպճային շերտը:

Հիմնանորոգումից հետո ճանապարհահատվածի երկարակեցությունն ապահովելու նպատակով կկիրառվի ճանապարհաշինական նորագույն տեխնոլոգիա՝ գեոգրիտե ցանցավոր ծածկ, ինչի շնորհիվ ասֆալտի վրա ճաքեր չեն առաջանա։

7

Ընկերության տնօրեն Արմեն Ղուկասյանը նշում է, որ թե՛ բանվորական ուժի և թե՛ մեքենամեխանիզմների բավարար քանակությունը թույլ կտա, որպեսզի հիմնանորոգման աշխատանքները, որոնք, ըստ պայմանագրի, պետք է կատարվեն 5 ամսվա ընթացքում, նախատեսված ժամկետից շուտ ավարտվեն:

4

Նա նկատեց նաև, որ ծրագրի մեկնարկի արդյունքում 2 տասնյակից ավելի աշխատատեղեր են բացվել:
Աշխատանքների որակը ստուգելու համար պարբերաբար շինհրապարակում են լինում նաև ՀՀ տրանսպորտի և կապի նախարարության պատասխանատուները:

«Տրանսպորտի ԾԻԳ» պետական հիմնարկի տնօրեն Էմիլ Սարգսյանի գնահատմամբ՝ աշխատանքներն ընթանում են ըստ ժամանակացույցի, և հիմնանորոգման արդյունքում կունենանք շատ լավ ճանապարհ:

Կատարված աշխատանքների տեխհսկումն իրականացվում է «Կոկս կոնսալտ» ընկերության կողմից։ Տեխսկիչ Ավետիք Մարտիրոսյանի խոսքով՝ ամեն օր տեղում կատարվում է աշխատանքների որակի վերահսկողություն, ինչը պետք է համապատասխանի տեխնիկական մասնագրերին:

9

«Շինարարներն աշխատում են նորմալ, որակով, բարեխիղճ»,- հավաստիացրեց Ա. Մարտիրոսյանը:
Շինաշխատանքների երկրորդ տեղամասում՝ Սևան քաղաքի հրապարակից Վարսեր գյուղ ձգվող ճանապարհահատվածում, վերականգնվում է ջրահեռացման համակարգը, հեռացվում են մայթեզրերի քարերը, որոնք կփոխարինվեն հայրենական արտադրության նոր, բազալտե եզրաքարերով:

10

Վարսեր համայնքի ղեկավար Զավեն Հարությունյանին հանդիպեցինք հիմնանորոգվող ճանապարհահատվածում: Նա խոսեց գյուղացիների երազանքի և կառուցվող ճանապարհի ընձեռող հնարավորությունների մասին.
«70-ականներից մինչև օրս չի վերանորոգվել ոչ մի ճանապարհ, իսկ հիմա այս ճանապարհով գյուղը կապվում է Սևան քաղաքի հետ, և գյուղացին իր արտադրած բնամթերքը կարող է տանել քաղաքում վաճառելու»:

5

Վերակառուցվող ասֆալտապատ ճանապարհը ոչ միայն գյուղը կկապի քաղաքին, այլև Վարսեր համայնքը Սևան-Ծաղկունք-Զովաբեր-Հրազդան հանրապետական նշանակության ճանապարհին: Երբեմն հնչող այն կարծիքին, թե՝ Սևան քաղաքի ճանապարհներն աչքաթող են արվել, Սևանի փոխքաղաքապետ Համլետ Սահակյանը համաձայն չէ: Նա նշեց, որ սա ճանապարհների հիմնանորոգման արդեն երկրորդ մեծամասշտաբ ծրագիրն է քաղաքում:

8

«2 տարի է՝ բավականին աշխատանքներ են տարվում այս ուղղությամբ: Տրանսպորտի և կապի նախարարության կողմից դեռ անցյալ տարի իրականացվեց Վլադիմիր Կարապետյանի անվան հրապարակի ճանապարհի հիմնանորոգումը և հիմա էլ շարունակվում են այս աշխատանքները: Ես ուզում եմ մեր ազգաբնակչության, քաղաքապետարանի, քաղաքապետի, բոլորիս անունից շնորհակալություն հայտնել ՀՀ կառավարությանը, Տրանսպորտի և կապի նախարարությանը, որ Սևան քաղաքը վերջապես մտավ ծրագրերի մեջ»:

6

Առայժմ խորդուբորդ և փոսառատ այս ճանապարհները շուտով կդառնան ասֆալտապատ և հարթ, իսկ Սևանի բնակիչներն ու քաղաքի հյուրերը, որոնց քանակն հատկապես ամռանն ավելանում է, կազատվեն ճանապարհային անհարմարություններից:

Այլ մանրամասներ՝ տեսանյութում…

ՀՀ տրանսպորտի և կապի նախարարության
լրատվական ծառայություն